إزاى تذاكر صح فى الثانوية العامة النظام الجديد

 تعريف بنظام التابلت بالصف الأول الثانوى| نظام الدراسة والمواد والتقييم وطريقة المذاكرة

السادة أولياء الأمور ,وطلاب أولى ثانوى القادم من المرحلة الأعدادية

نقدم لكم في هذا المقال تفاصيل هامة عن نظام الدراسة والامتحان بالصف الأول الثانوى في ظل منظومة التابلت من حيث نظام الدراسة والمواد والامتحانات لأولى ثانوى عام نظام التابلت فى البداية لازم تعرف شوية اختلافات بين نظام الدراسة في المرجلة الأعدادية ونظام الدراسة في المرحلة الثانوية

تعريف بكافة تفاصيل النظام الجديد للثانوى العام 

أولا: نظام الدراسة :

الدراسة تتم على ترمين , حيث تقسم كل مادة على الترمين 

وما يتم دراسة بالترم الأول يصبح منتهى بمجرد الامتحان فيه

وكده اللى هتمتحن فيه الترم الأول مش هيجئ منه الترم الثاني

مفيش كتب ورقية  لك , هتستلم تابلت وهتنزل عليه الكتب  إلكترونيا وبالمدرسة واى فاى متصل بالتابلت 

ثانيا : المواد  الدراسية :

وبتتقسم هنا المواد إلى قسمين 

مواد تضاف للمجموع ومواد لاتضاف للمجموع

 أولا : المواد المضافة للمجموع : وهى 10مواد

اللغة العربية و اللغة الأجنبية الأولى (الإنجليزى) , والرياضيات

واللغة الأجنبية الثانية ( فرنسي أو ألمانى أو إيطالي) والفيزياء والكيمياء والأحياء و التاريخ والجغرافيا و الفلسفة

ثانيا : مواد غير مضافة للمجموع (لكنها نجاح ورسوب)

وهى مواد لها امتحان ولابد من النجاح فيها وتشمل:

التربية الدينية ـ الحاسب الآلى ـ التربية الوطنية

التربية الرياضية ـ النشاط المهنى

ثالثا: درجات المواد المضافة للمجموع

اللغة العربية 50 درجة | اللغة الأجنبية الأولى 40 د

اللغة الأجنبية الثانية 30 د | الرياضيات 40 د

الفيزياء 20 د | الكيمياء 20 د | الأحياء 20 د

التاريخ 20 د | الجغرافيا 20 د | الفلسفة 20 د

المجموع الكلى 280 د

نظام الامتحانات والنجاح والرسوب لأولى ثانوى: 

الامتحانات إلكترونية على التابلت ( قد تمتحن ورقيا حسب قرار الوزارة لأنه بتغير من وقت للتاني) 

كل ترم له امتحان  في المقرر الذى درسته بالترم , 

شرط النجاح في كل مادة : 

الحد الأدنى للنجاح في المادة هو 50 % من مجموعها 

مع ملاحظة أن الترمين بيكملوا بعض في الدرجات

مثال : مادة الفيزياء 20 درجة موزعة على الترمين , 

كل ترم 10 درجات عشان تنجح فيها لازم تجيب 10 درجات على الأقل في الترمين , فمثلا لو جبت الترم الأول 3 من 10 يبقا 

لازم تجيب الترم الثاني 7 من 10 على الأقل .

نصائح للمذاكرة فى المرحلة الثانوية

1- انت أكيد سمعت عن اسئلة النظام الجديد فى المرحلة الثانوية وعلشان كدة متصدقش كلام حد مجربش النظام دا يعنى لو حد من النظام القديم قالك ذاكر بطريقة معينة قوله ان الطريقة دى متنفعش فى النظام الجديد

2- فى النظام الجديد ممكن تذاكر كتير لكن متعرفش تحل الأسئلة لأنك ذاكرت غلط

3- لما حد يقولك افهم متحفظش ممكن يكون ردك الطبيعى " يعنى اعمل ايه بالظبط " أنا عايز طريقة المذاكرة بالخطوات

4- ممكن يكون فى الكتاب المدرسى تعريف مثلا للجغرافيا السياسية وانت تقول ده حفظ مش فهم وأنا بقولك ان دا فهم مش حفظ فيكون ردك برضو ازاى

وعلشان كدة لازم تحدد مشكلتك فى النظام الجديد فى انك مش بتذاكر صح وانك محتاج تعرف ازاى تذاكر

وكمان لازم تبعد وتخلص نفسك من المعتقدات السلبية والخاطئة مثل :

1- انك مهما ذاكرت مش هتعرف تحل لأن أسئلة النظام الجديد معقدة وتعجيزية " وده مش صحيح "

2- ان النظام الجديد ممكن يتلغى " لا خلاص انت بقيت فيه فلازم تتعايش وتعود نفسك عليه "

3- انك طلعت من سنة أولى وسنة تانية متعرفش حاجة علشان كدة مش هتعرف حاجة فى سنة تالتة " لا برضو ده غلط ممكن تركز فى سنة تالتة بالطريقة الصح للمذاكرة "

 الطريقة الصحيحة للمذاكرة

والأن اعرض عليكم ازاى تذاكروا بالطريقة الصحيحة وبنواتج التعلم الحقيقية :

1- شوف كل مادة وافهم المادة دى عايزة منك ايه لأن لكل مادة طريقة مذاكرة مختلفة فمثلا مذاكرة الجغرافيا والتاريخ تختلف عن الفيزياء والرياضيات

2- اقرأ الموضوع كويس وحاول انك تفهمه " طب ازاى " لو مثلا فى تعريف مكتوب فى التاريخ قوله انت باسلوبك العامى واديله أمثلة من الحياة واستنتج منه معلومات تانية

مثال : تعريف الجغرافيا السياسية هى فرع من فروع الجغرافيا البشرية يهتم بدراسة المقومات الطبيعية والبشرية للدولة وتأثير ذلك فى قوتها وعلاقاتها الدولية

نستنتج من هذا التعريف أن الجغرافيا السياسية :

- تتشابه مع فروع الجغرافيا البشرية وتختلف عن فروع الجغرافيا الطبيعية

- محور دراستها هو الدولة

- تركز فى الدولة على قوتها أو ضعفها

- لها علاقة بالعلوم الأخرى لأنها لن تستطيع تحديد قوة أو ضعف الدولة إلا بالاستعانة بالعلوم الأخرى التى تعطيها صورة كاملة عن الدولة

3- متذكرش بالورقة والقلم زى النظام القديم لكن ممكن تكتب ملاحظاتك – أو ملخص للدرس – أو معلومات اضافية بجانب معلومات الكتاب المدرسى

4- متحلش أسئلة على الدرس بالنظام القديم ومتسمعش أى شرح بالنظام القديم لأنه تعطيل لوقتك

5- حل أسئلة كتير للدرس على النظام الجديد وكل شوية ارجع لمعلومات الكتاب وضيف ليها كل ما تتوصل إليه من معلومات جديدة

6- قسم السؤال إلى أجزاء – واستنتج معلوماتك عن كل جزء – ثم اربط بينهما

7- لما تختار اختيار واجابة معينة لازم تقول انت اخترت الاجابة دى ليه ويا ريت كمان تدى أمثلة علشان تكون متأكد من اجابتك بالدليل " وده برضو هيزود معرفتك وفهمك للدرس "

8- لازم تكون عندك معلومات عن محتوى المادة نفسها ومصطلحاتها

مثال فى الجغرافيا : لازم تبقى فاهم يعنى ايه تضاريس – حدود – مناخ – نبات طبيعى – قارة – نشاط اقتصادى – وسائل نقل – وسائل اتصال – نهر دولى – أقلية .... وغيرها , وتكون عندك معلومات عن دول العالم وقاراتها

9- لازم تعمل باستمرار ربط بين معلومات الدروس كلها , وتستنتج معلومات جديدة وممكن تساعدك الأسئلة الجديدة فى دا عن طريق انك تجاوب عن سؤال واحد بمعلومات من دروس مختلفة

10- ناقش معلميك باستمرار وجادلهم فى المعلومات , واتكلم مع اصحابك عن معلوماتك الاضافية عن الدرس

وفى النهاية لا تقرأ هذا الكلام وتقول دا كلام صعب لأنه بالعكس أسهل كتير من الحفظ أنا عايزك تشوف الأسئلة الجديدة وتبحث وتناقش وتجادل فى الاجابات علشان فى الاخر تكون مقتنع بالاجابة , وكل ما تحل أسئلة أكتر وتناقشها معلومات هتزيد بالتدريج وهتلاقى أسئلة كتير ( مش هقول كلها ) أصبحت سهلة بالنسبة ليك

أما بالنسبة لسؤال " اعمل واذاكر ازاى فى ليلة الامتحان " دا سؤال سابق لأوانه وباذن الله لما تذاكروا وتفهموا السنة كلها ابقى اقولكم ان شاء الله تعملوا ايه فى ليلة الامتحان

والمهم انك تكون عارف ان النظام الجديد أصبح هو أساس التعليم فلو معرفتش تتعامل معاه بالطريقة بتاعه هتكون بتضيع وقتك ومجهودك على الفاضى

" ذاكر صح هتوفر مجهود , ذاكر صح هتعرف تحل الأسئلة الجديدة , ذاكر صح هتتفوق وتجيب درجات عالية باذن الله "

وتأكد أن لكل مجتهد نصيب , وأن الله لا يضيع أجر من أحسن عملا